السبع وصايا

ميصاء الأنوار 

*بصوت كابتن مدحت*

بنقابل ناس كتير في حياتنا اليومية وفي منهم الموضوع بيتطور لصحوبية وتبقوا besties والذي منه، وناس تانيين بيتحطوا في خانة ال"مبحبهمش بس مبكرهمش" ودول ناس برضو مية فل وعشرة أما بقي في ناس بنديلهم من الأول الوش الأبلكاش وبنعرفهم ان احنا مكوناش صحاب ومش صحاب ومش هنبقي صحاب ومع ذلك الIQ بتاعهم أقل من IQ الدبانة الرضيعة بتاعت الصيف الي بتيجي تلزق في وشك ومبتستوعبش مفهوم الهش!

هؤلاء الأشخاص اللي هما basically عارفين نفسهم وبيستعبطوا وبيبقوا زي الclingy girlfriends عندي ليهم بضع من الوصايا اللي المفروض يتبعوها عشان نبقي علي مياة بيضا ومنكدرش بعض. 

-بي.أس: أنت\ي لو فعلا متعرفنيش وأنا مش مأخداك\ي عليا أوعي تعمل\ي اي حاجة من الحاجات اللي هتتكتب تحت دي وإلا رد الفعل هيبقي بايـــــــــخ وهحرجَِك!

أولًا: إياكوووووا إياكووووووا حد يلمس شعري! لأ I'm serious & I mean it! لا تقوليلي شعرك جميل انهاردة وتمسكيه ولا تفكيلي التوكة ولا تشديه كنوع من الهزار الأفريقي الغبي ولا تحاولي ترشي عليه مياه ولا تضفريه ولا  أي  حاجة!!!

أنا لو عايزاكي تعملي فيه أي حاجة هقولك مش هتكسف والله.

ثانيًا: متهوبيش ناحية الشنطة وإلا رسغك *أيوة رسغك-كفك-إيدك* هتبقي أخر مرة تشوفيها! لو عايزة منها حاجة أو بتدوري علي حاجة أو صُدِف وأدتيني حاجة أشيلهالك وعايزاها أطلبي وطلباتك أوامر وربنا بس الشنطة is a no-no zone أوكيـــه!

ثالثًا: لو شوفتيني بالصدفة باكل لبانة متسأليش "أيه دة، دة لبان؟" عشان بيبقي شكلك بايـــخ أوي وعشان كمان السؤال غبي! ومتقوليليش هاتي واحدة عشان مش هديكي. بجد. اللبان دة مسألة حياة أو موت بنسبالي وأنا أفضّل أموت وأنا في بُقي لبانة عن أني أموت ندمانة أني أديتك اللبانة D:

رابعًا: a- متدخنش في وشي *عشان أنت لو فعلا عارفني يبقي أكيد عارف علاقتي بالسجاير عاملة ازاي* ومبدأيًا كدة لو فكرت في أنك تنفخ الدخان في وشي كنوع من اللطافة بروبابلي هدبسلك شفايفك في بعض. 

 b- هنفترض اني سايبة جنبي علبة عصير أو كان بيبسي مثلا وبتكلم مع حد وأنت\ي جيت\ي شربت\ي منها ايه متوقعين يحصل! لأ، توؤتوؤتوتؤوتؤوتؤ DON'T! لسلامتك الشخصية بقولك بلاش. اولا ewww اوي يعني، ثانيا لا تمت للصحة العامة بشلن! 

خامسًا: -دي أهم واحدة وياريت نركز تلات أربع خمس شويّات هنا كدة-

a- مش كل شوية تطبطبي عليا، تحطي إيدك علي كتفي او تنامي عليه، متمسكيش إيدي احنا مش متصاحبين ولا متكلمة عليكي يا حبيبتي وأخيرا متأنجچنيش واحنا بنعدي الشارع أو مبنعديهوش أو ابدا! لأ متعمليش كدة، لأ حقيقي. 

b- دي تعتبر نصيحة عامة لسائر البشر يعني، لو بنتكلم مع بعض سيب\ي مسافة بيني وبينك عشان أبقي بكلمك كلك علي بعضك مش شايفة منك أجزاء واللي هي غالبا بُقك وكمان عشان متنفسش الكربون والقرف اللي بيطلع منك دايركت في وشي. 

سادسًا: أي ان كان اللي أنا لبساه وحش حلو متخني مرفعني مطولني مقصرني مكبرني مصغرني لايق مش لايق متقوليش رأيك! عشان فعليًا رأيك ميهمنيش وطالما أنا بصيت لنفسي في المرايا وقبِلت علي نفسي أني انزل الشارع بهذا المنظر إذا ف أنا راضية والحمد لله وحتي لو مش راضية ملهاش لازمة تزيد\ي من وضعي سوءًا. بص\ي متكومنتيش علي مظهري عامة أحسن، كيب إت تو يورسيلف بيتش!
سابعًا وليس أخرا: الأسئلة الشخصية! بلاش، ملهاش لازمة، سخيفة فعلًا ومحرجة اللي هو أعرفك بقالي أسبوع ولا أقل أو أكتر وهاتك يا سؤال "انتي مصاحبة" "متحجبتيش ليه" "ناوية يعني" والأسئلة اللي من نفس الcategory دي عشان حقيقي مش هجاوب وبجد أسئلة حِشرية لأبعد التخيلات. 

كل ما سبق ذكره طبعا نستثني منه الناس الحلوة العزيزة علي قلبنا واللي هما عارفيين نفسهم ولو مش عارفيين نفسهم يولعوا يعني هعملهم ايه! D:

الدنيا هتبقي لڤلي لو بطلتوا تعملوا حاجات صغيرة مستفزة كدة

  ✌peace out 

بي-أس: أنا مش معقدة وربنا ومن حق كل مواطن أن مرارته تتفرتك من الحركات دي عادشيي D: 

"فيها ~حاجة~ حلوة " بشاور بأيدي زي هشام منصور

طبعا الكلام اللي هيتكتب هنا لا ولن يدل أو يعبر عن حبي للبلد أوبلابلابلابلا ولكن كشخص حقّاني لازم نقول اللي لينا واللي علينا برضو، وبناء عليه قررت أكتب شوية حاجات ممكن تكون أما بتحصلك في مِصرنا الحبيبة بتحس أن في هاه يعني بصيص من الأمل *هو في الواقع بتحس أنه كأن حد أعمي أصلا وبيفكروا يعملوله عملية ليزك بس أشطة" D: 

1. لاسمح الله لاسمح الله يعني وأنت\ي (وفي الأغلب انتي يعني) بتعدي الشارع ومقلقة بتلاقي حد جاي جنبك بيقولك "أنا هعدي وأنتي عدي معايا ف نفس الوقت" ودة شخص عظيم ويستاهل حاجات كويسة كتير ونتمني بعد ما يعمل العمل الخيّر دة ميكونش غرضه أشياء أخري. 
2. أحيانًا (وخلينا نتّك علي أحيانا دي) لما تكون بتشتري حاجات من البقّال او السوبر ماركت يعني ومعكش فكة أو باقيله جنيه ولا اتنين بيسامحك فيهم عشان هو حد نِفسه حلوة وعشان غالبا هو اتربي علي كده في صغره. 
3. تكبير الدماغ بغرض تمشية الأمور وتسيرها، زي مثلا موقف قبل كدة حصل أن اتنين خبطوا ف بعض جامد بس اللذيذ ان كل واحد منهم نزل من عربيته بص عليها وبص للتاني ابتسم ابتسامة صفرا ومشي! دول أحد الأشخاص اللي بيحتاجوا جايزة نوبل في التكبير الدماغ *شابوه* 
4. تكوين صداقات سريعة ولحظية في المواصلات؛ ناس بتعتبره عيب وناس بتعتبره ميزة و في الأغلب الصداقات دي بتتكون بسرعة عشان احنا طبعا شعب عفوي وبيدلدق مشاكله وهمومه اليومية مع أول شخص يبتسمله ولا يفتح معاه كلام.
5. رغم أن 99% من تعداد الشحاتيين والمتسولين في البلد أغني منك أو نصابيين إلا أنك برضو بتديلهم اللي فيه النصيب لعل وعسي القِرش دة ينفعك فيما بعد من مصيبة ما وربنا ينجدك منها علي فعلك للخير بنية حبوبة. 
6. مصر فيها بعض الشوارع اللي ممكن تتمشي فيها عادي -سبحان الله-! جميلة وفيها شجر كتييير والشارع شبه نضيف يعني والناس اللي ماشيين جنبك رايقين برضو وتحسوا انكوا علي نفس الخط مع بعض ومستكنيصيين. >مثال للشوارع دي الزمالك، جاردن سيتي، الكوربة، بعض أماكن في المعادي إلخ.
7. بنبقي عايزيين نساعد بعض بشتي الأشكال بس الموضوع بيتفركش وبيقلب بتودية في داهية في الأخر؛ يعني عشان أقولك اتجاه شارع ولا أوصفلك حاجة هلففك الكورة الأرضية بس أنا نيتي مش سيئة أوي يعني، أو عشان أقضي مصلحة هيطلع عين اللي جابوني مشاوير ودة بواسطة منك كمان! أومال لو منغير كان حصل ايه؟ 
8. عندنا مطاعم كتييير حلوة وبنعمل أكل زالفل والله الغالي منها والرخيص (وأنا في اعتقادي الشخصي مفيش واحد مصري بينام جعان بغض النظر عن حالته الاجتماعية) 
9. حياتنا مبتقفش علي حاجة لا حظر ولا قلق وضرب نار ولا اعتصامات ولا يحزنون احنا بالصلاة ع النبي كدة لعبنا ماتشات كورة من بعد الحظر ما يبتدي لحد الصبح وكنا بننزل في الشارع نتفرج علي الشوارع وهي فاضية وبنصور الراجل اللي بيفك القنابل closeup shots كمان. *زئير أسد في الباكجراوند* 
10. الديليفري موجود شبه 24 ساعة ودي حاجة تحداني صهيوني خسيس أني ألاقيها في اي بلد تانية *مش هتلاقي أي بروميس* 
11. عندنا بيكينيز، سيكسي جيرلز وكل ما تشتهيه القلوب زي ما الفنان جاد شويري قال احنا مش بتوع خيم وجِمال وغترة وجلابية والكلام اللي الناس واخدينه عننا دة -إلا اذا كنا عامليين جلابية بارتي أو كامبيبج في الصحرا ولا سفاري- 
12. عندنا مصايف من أحسن المصايف في العالم ورملتنا أحسن رملة *سمعتها في مكان ما متجادلوش* والساحل ومارينا وسهل حشيش والجونة وزايطيين الحمد لله
13. نعتبر fashionable نسبيا أوبنحاول يعني حتي لو فشلنا وشكلنا قلب بغبغان استوائي ودي حاجة كويسة وبتدل علي تفتحنا علي العالم الخارجي نسبيا برضو! 
14. عندنا المقدرة اننا نتكلم أكتر من 5،6 لغات ودة شيء بيبهرني وبحسني فخورة بالناس دي لأن أعتقد محدش عنده القدرة دي في حتت تانية! الراجل اللي بيبقي واقف عند الأهرامات مثلا دة بيتكلم ميقلش عن 10 لغات *شابوه لعمو اللي ساند ع الهرم* 

ودي نسبة صغيرة أوي من حاجات كتييرة حلوة في البلد تعتبر صغيرة ومبتدومش أوي في تأثيرها لكن بتبسطك في لحظتها وبتخليك مش متكدر أوي يعني وأنت ماشي في شوارعها.

- لو قابلكوا أي موقف تاني حسسكوا بالاستكنياص والزقططة في البلد الغبرة دي قولوه وانشروا حاجة إيجابية بدل ماحنا بنعقد نولول ونندب ع الحاجات القذرة اللي ف البلد

البسوا نضارات شمس هتلاقوا لفلي الدنيا لفلي زي أونكل سمير صبري ;) 

It's إياااحة time

-وحوي يا وحوي، إيييااااححححة- ثانية واحدة! أيه ال"إييياااحححة" دي؟ معناها أيه يعني؛ دي مش بتتقال مرة واحدة بس ف الأغنية لأ دة مُصر انه وحوي إييياحة وكمان وحوي إييياحة تاني وراح شعبان برضو إييياحة وجه رمضان كمان إييياحة والموضوع خرج عن السيطرة!

أي إن كان معني "إييياحة" يعني، كل سنة وانتوا طيبيين ولذوذيين وحبوبيين ومش هاقول يارب تكونوا أحسن؛ لأ، ياريت يعني بصراحة تبقوا أحسن معلش اضغطوا شوية علي نفسكوا وخليكوا أحسن لمصلحتكوا أولًا ولمصلحتنا ثانيًا *وش يعني أهم حاجة مصلحتنا متقرفوناش*. طبعا زي ما احنا عارفيين الوصايا العَشر اللي بتتقال قبل رمضان ومنتقلش ف الأكل وأشرب شوربة الأول وبلاش مياه عشان بطنك متقفّش وقووم يابني صلي التراوييح المسلسل بيتعاد 100 مرة وخلصونا مين فيكوا هيعمل الشاي بلبن بالليل وكل الكلام اللي لو اتعصرنا هننزله عصير ونبيعه ف رمضان أصلًا وهيغطي ع الكركديه والقمر الدين D: 

بس في كدة كذا حاجة بيحزوا ف نفسيتي شوية وهتخنق بيهم لو مقلتهمش دلوقتي ف استحملوني معلااهش :') 

1. صلوا قبل الفطار أول ما الأذان يأذن علطول عشان صدقوني *وأسأل مجرب والشهود عليه* لو قعدت كلت هتجيلك تخمة وتبقي زي البغل وهتكسل أو بمعني تاني مش هتقدر اصلا توطي تركع ولا تسجد وبنسبة الحش اللي حشيته احنا عارفين كويس الأضرار الجسيمة المترتبة علي هذا الفعل D: 
2. أبوووس ايديكوا أبوووس ايديكوا تاني أنا مش مهتمة إطلاقا اعرف النيوزفييد بتاعكوا ف رمضان! لأ حقيقي مش مهتمة أعرف مين مات ف المسلسل ولا انت خلصت الجزء الكام ف المصحف ولا قد ايه الكركديه ناقص سكر وطعمه يااع. كييب أيت تو يورسيلفز :') 
3. بمناسبة بقي القرآن انا شايفة التقسيمة اللي بتتقال كل سنة دي مش عارفة كام صفحة بعد كل صلاة المصحف هيخلص يمكن قبل رمضان كمان دي مفيدة جدا وسهلة وممكن تلم بتوع المغرب والعشا مع الفجر وأهو بيبقي دايما اكتر وقت مفترج والهوا ف البلكونات بيبقي حبووب. 
4. رسالة أحب أوجهها لكل أم؛ والله والله مهما قلتوا قد ايه المياه هتنتنيل تعمل فينا ايه لو شربناها أول حاجة ما هنقتنع وبرضوا هنشرب! سيبونا نخلص الكام كوباية المشبريين دول بمزاج الله يكرمكوا. 
5. والمصحف محدش بياكل الخشاف ف البيت إلا الأم والأب وأي شخص هيجي يقولي غير كدة هديله بالقلم علي وشه وأقوله أنت بتنقي حاجات معينة منه بلاش نضحك علي بعض -.- 
6. رسالة تانية للأمهات؛ ياريت أخر حبة ف الكركديه *شوية ورق الكركديه الاخرنيين ف المصفاة دول* ميتحطوش ف ازازة عشان بجد طعمهم بيبقي مياه غسيل.
7. ياريت نشوف نشاط الولاد بيزداد كدة ويعملولنا السحور ولا يصبولنا عصير بدل ما هما بروطات ما شاء الله؛ لا منهم ولا كفاية شرهم! 
8. إعلانات اتصالات هتبقي لبانة ف بُق المواطنيين المصريين كلهم ف ياريت نكسر القاعدة ومنعملش كدة، بلييز! 
9. نمتنع عن الغتاتة والتلامة والغباء أيااااكم والغباااء يا جماعة في رمضان والله دي أكتر حاجة بتفطّر ف رمضان! 
10. الشتايم! ياريت نبقي نتّبع ال 3 Cs اللي هما ايه بقي؛ خليك cool, calm and collected شوفتوا بسيطة ازاي. أي حد مبتحبوش\بيخنقك\بتكره\مش طايق وش أهله، بكل سهولة أمشي وسيبه او قوله "سيبني ف حال الدنيا صيام" أو اعمل نفسك بتسبح وهسس كدة عشان تديله الاحساس وامشي وسيبه برضو عادشيي. 
11. الشتايم أونلايين بقي D: دي وادي تاني. ممكن يا كابتن يا لذوذ يا حبوب أرجوك مش لازم تحكي أي حوار حصلك ف حياتك الشهر دة بالذات بالتفاصيل الشتيمية المفصلة! أرحمني شوية من سطمبة "كنت وماشي ولقيت واحد ابن شنتسنلال قلت ينعل ابنمهشاىه قالي خد ياض يبن المهعصةتةبثهن" يعني لأ ميرسي شكرا خلي الموضوع اللي مضايق مووت دة لنفسك بلييز 
12. ارحموا ابو ام ابن خالة اللي خلفونا tag في صور فانوس او اي ان كان. في chat box ع اليمين كدة شايفينه! أكتب كل سنة وانت طيب واعملها copy-paste لكل اللي انت عايزهم و"انت" تجوز للبنت والولد بجد ومتقلقش هيترد عليك والله 
13. حولوا ماتكلوش برة لأنه من أبشع 17 حاجة ف الكوون
14. كلنا عارفيين ان الكنافة بالمانجا او النوتيلا "وااو جامدين مووتزز ومفيش منهم اتنين ف الحياة" أوكييه، so please no more 
15. ياريت البنات اللي ملهاش ف الكورة تقعد بقي علي جنب وتركز ف مسلسل أحمد عز وتسيب الماتشات في حالها. خلاص يا ماما منك ليها اسبانيا وايطاليا وانجلترا طلعوا يعني no more hotties with sparkly sweat ماشيي!! 
16. معروفة أخر حد بيخلص أكل ع الترابيزة بيلمها وراه وأول واحد بيقوم عليه المواعيين، واضحة أهيه!
17. البنات تاني، ياريت موضة أتحجب ف رمضان واسيبه بقية السنة دة بلاش الله يعمر بيتك! يا السنة كلها يا بلاش منه! شغل سبت اتنين أربع دة انتهي خلاص 
18. التريحة بعد الفطار ولو 10 دقايق لازم ولابد منها زيها زي الصلاة بالظبط كدة 
19. مش عايزيين سحور ف tamarai و amici و left bank وكدة بجد لأ!!! لأ مش هسمحلكوا بالشغل السييس دة! 
20. وأخيرًا وليس أخرًا حبوا بعض يا ولاد يمكن ربنا يحبكوا ولا حاجة :) واحتذوا بأونكل سمير صبري ف مقولته الشهيرة 

"لفلي الدنيا لفلي" ;) 

العُمق

العُمق 

كلمة منتشرة اليومين دول، بنسمعها من ناس كتييير وبنشوفها مكتوبة status علي جميع أنواع مواقع التواصل الاجتماعية؛ من فيسبوك لتويتر لإنستجرام لواتسآب وعد عندك بقي بقية الحبشتكانات دي ولكن المُلاحظ في الموضوع دة وهو الأبرز أن مفهوم العمق عند الناس بيتفاوت.

 الناس طبعا درجات -ونقدر نقول كمان مزاجات- في بالتالي أكيد عُمقك غير عُمقي غير عُمقهم؛ في ناس عمقها أنها تقري كتاب لأحمد مراد ولا أحمد خالد توفيق وهي بتشرب فنجان قهوة وقاعدين في البلكونة وفي الباكجراوند موسيقي، وناس تانية عمقها انها تقعد علي البحر وتسمع فيروز في الهيدفونز وبرضو تقري كتاب (ممكن نقول "الأسود يليق بك" المرة دي)، في بقي عمق تالت ألا وهو القعدة في الأوضة ذات النور الخافت اللي بيجيب استجماتيزم دة وبرضو في الباكجراوند موسيقي (بس المرة دي Jazz بقي عشان يتماشي مع الموود) والقعدة علي الأرض والرسم بقي وأييه! عمق عمق يعني.

    الفكرة هنا بقي أيييه أن أصلا مش معروف "ما هو مفهوم العمق؟" عند الناس دي! يعني أيه عمق أصلا! وأيه العمق في شوية الحاجات اللي قولتها فوق دي! ولييه لما حد مبيبقاش عميق زيّ ومبيعملش نفس الحاجات بيُنبذ اجتماعياً! يعني في نهايات ال90 أوائل ال2000 كان بدل مفهوم "العمق" كان اسمه "مزاج" أو "دماغ"؛ يعني عادي أما أقول مثلا "أنا أغاني أم كلثوم دي بتعملي دماغ عالية" إنما لما أقول "فيروز دي العمق كله"! علل؟ ماذا تعني كلمة عمق؟ يعني اللي هو بيتحس ازاي العمق دة؟

    هل العمق دة أني اسمع شوية الباندات الcool  أوي الاندرجراوند ويبقي عندي ساوند كلاود ومبفوتش حفلة لمشروع ليلي وأن الساقية ودرب 17 18 دي بيتي التاني والكلام دة؟ ولا أني كل 3ثواني بالظبط أحط صور ليا مع كتب أحمد مراد وقد أيه كتاباته جامدة نينتي و"واو 1919 دة أحلي كتاب Eva" ولا أتصور وأنا بشرب فنجان القهوة في البلكونة وفي بقّي السيجارة وبطلع دخان علي هيئة دواير دواير ولا أيه؟

ليه الناس حصرت شوية الأفعال دي في المفهوم الضيق دة واللي يكاد يكون ملهوش أي تلاتيين معني! يعني أنا ممكن ببساطة جدا أقول أنا فعلي للشيء دة بيبسطني وبيخليني مزاجي مظبوط أو بيحسسني بالنشوة مثلا ولا أي احساس في الحياة إنما إشمعني عُمق!!! ببساطة جدًا واضح ان مفهوم "العمق" هو الانبساط+المزاج المعدول+الهدوء النفسي (أو دة علي حسب فهمي أنا)، فإن كان هو دة فعلًا المعني الصح فأكيد أكيد مش الحاجات اللي تتعد علي الصوابع دي بس اللي بتبسط الانسان؛ يعني مثلا ممكن انسان يحس –العمق- لما يشرب كوباية عصر قصب مشبرة في عز الحر أو ان انسان تاني ينزل يتمشي في الشارع ساعة العصاري ويشم الهوا اللي هيبدأ يسقع أو ان انسان تالت ياكل أكلة المحشي المتينة ويحبس بعدها بكوباية شاي بالنعناع أو ان انسان رابع يشرب زبادي خلاط ويقعد مع صحابه علي القهوة أو ان شالله حتي واحد يسمع جاستن بيبرعادي جدا ويحس أن عميق عمق الدنيا والكون مش سايعه.

بلاش نقعد نخترع في مفاهيم وندّي للحاجات اللي بنعملها في الدنيا الصغيرة دي مسميات ونعقد العقد ونكلكع الكلاكييع؛ خليكوا لذوذين كدة وكل واحد يعمل اللي يريخه ويبسطه ومش مهم رأي الناس أيه في اللي بيعمله وكفاية الoverrating اللي بقيتوا فيه دة، دة حتي زي ما الأستاذ الفنان سمير صبري قال "لفلي الدنيا لفلي"  

"في الحقيققققققققققققققققة......................"

 في الواقععععععع....... 

"مش عارف\ة والله" "أنا مش فاهم\ة حاجة" "يلا كلهم ولاد كلب ياكش يولعوا"; كل دة كلام بيتقال كل يوم عادي يعني وبقي الرد المناسب لأي حاجة ف الحياة! فعليا أي حاجة ممكن تردوا عليها بالكام كلمة دول, يعني مثلا "ماما, هو الأكل أيه النهاردة؟" "والله مش عارفة", "أيه دة هو أيه اللي قطع سلك الشاحن؟!" " والله أنا مش فاهم", "تفتكر سيرينا فان ديير وودسن سابت نايت وراحت لدان همفري ليه؟" "يلا كلهم ولاد كلب!". 

شوفتوا!!! دة مثلا دليل حي علي ان الأجوبة دي مناسبة لأي استفسار ف الدنيا وit makes perfect sense. محدش بقي فاهم حاجة ولا عارف حاجة والكل بقي خلقه ضيق ونفسه قصير زي الراجل اللي لابس جرافتة قافشة علي رقبته ف درجة حرارة 45! 

بس ف نفس الوقت بيعجبوني أوي الناس اللي ضاربين الدنيا 100 جازمة وعايشيين ف الla la land ; عادي جدا بيصحوا الصبح ياخدوا الcoffee بتاعتهم ف ستاربكس ويفطروا فcosta وبعدين يقوموا رايحيين واحد الlunch break بتاعم ف lemon tree & co. ويقعدوا ع النيل ويقولك "wow, Egypt is truly beautiful, no filters" وطبعا بعد الشغل يطلعوا علي sequoia ولا amici ويقضوا السهرة هناك!!! اللي هو في اييه ياولاد الناس الأغنية! هو انتوا اتخلقتوا عشان تفقعولنا المرارة الحيلة ولا أيه! -أنا مش بحقد ولا حاجة بس اللي هو كتة حراوم خاوليس يعني! راعوا مشاعر أخواتكوا المقفهريين-.

 هو أينعم أحيانا الواحد بيروح ستاربكس يعني وبيتغدي ف سبيكترا ولا تشيليز بس الناس دول بيبقوا واخدينها أسلوب حياة ودة بيفقع بس ف نفس الوقت ف قرارة نفسك بتقول "طب انا ليه مبقاش زيهم! يعني مش لازم أروح نفس الأماكن وأعمل نفس حاجاتهم بس ليه مضربش الدنيا طناش وأعيش حياتي زيهم؟" 

ماهو طالما أنا كدة كدة مش فاهم\ة ولا عارف\ة والناس كلها عايزة الحرق يبقي يالا نفسي بقي. 

يلا, روحوا اشربوا شاي بالنعناع   

غوووايش

هي الزيطة والزمبليطة

والزحمة والدوشة

 والقلق والجمال

 والبساطة والذكرايات

 والحب والاختلاف

 والاناقة والروشنة

 والطفولة والوقار

 والغالية والرخيصة

والطويلة والعريضة

 والتخينة والنحيفة

والعراقة والحداثة 

وهو وهي وهم 

عمرك فكرت ان الغوووايش ممكن يكون ليها كل المرادفات دي!! أكيد لأ،. 

هنا بقي هتتعرفوا كل حاجة عن كل غويشة والقصة اللي وراها